Хрватската министерка за регионален развој и фондови на Европската унија Габриела Жалац, денеска, под притисок на јавноста, соопшти дека на премиерот Андреј Пленковиќ му го понудила мандатот на располагање, откако во саботата изутрина, возејќи со истечена возачка дозвола удри девојче и ѝ нанесе тешки повреди.

Таа денеска пред новинарите во Загреб истакна дека веднаш по несреќата разговарала со Пленковиќ и му ја понудила својата оставка, а истото го направила и утрово. Од друга страна, во саботата владиниот портпарол Марко Милиќ рече дека ниту министерката поднела оставка, ниту некој тоа од неа го очекува.

– Јас оставка понудив од морални и сите други причини, рече Жалац, додавајќи дека апсолутно признава сè што се случило тој ден.

– Тоа што мене ми се случи во саботата, ни би сакала никому да се случи. Појдов во продавница, кога пред возилото истрча девојче. Ја удрив, веднаш и помогнав колку што можев, повикавме полиција и Брза помош и превезена е во болницата во Винковци, а оттаму во Осиек, појасни хрватската министерка.

Што се однесува на возачката дозвола, таа рече дека поради тоа што не вози често, не ја проверила дозволата и не видела дека од 2016 година не е важечка, но дополни дека тоа не ја оправдува.

Таа се извини и на хрватската јавност затоа што, од незнаење, возела без валидна возачка дозвола.

Во сообраќајната несреќа во Винковци во саботата, тешки телесни повреди доби девојче кое надвор од пешачки премин сакало да претрча преку улица, кога ја удри возило, со кое управувала Жалац.

ОСТАВЕТЕ ОДГОВОР

Напишете коментар!
Ве молиме внесете го вашето име овде